КӨЛБЕУ КЕН ОРЫНДАРЫ ҮШІН ТАЗАРТУ КЕНЖАРЫНЫҢ ТЕХНОЛОГИЯЛЫҚ ПАРАМЕТРЛЕРІНЕ БАЙЛАНЫСТЫ ДЕФОРМАЦИЯЛАРДЫҢ ӨЗГЕРУ ЗАҢДЫЛЫҚТАРЫН ЗЕРТТЕУ

Мақалада камералық-бағаналы қазу жүйесін қолдана отырып, Жыланды кен орнының мысалында құлау бұрышы 20-дан 35 градусқа дейінгі көлбеу кеншоғырларды өндірудің технологиялық схемасын әзірлеу қарастырылды. Қазу жүйесінің теріс қабылданған параметрлерінен туындаған геомеханикалық жағдайлардың нашарлауы осы параметрлерді түзетуді қажет етеді. Бұл мәселені шешу үшін соңғы элементтер әдісін қолдана отырып, тау жыныстарының массивін модельдеу жүргізілді. Нәтижесінде жұмыс тереңдігіне байланысты негізгі қысу және созылу кернеулері анықталды. Сондай-ақ, әртүрлі тау-кен факторларын ескере отырып, камерааралық кентіректердің параметрлерін есептеу жүргізілді. Сандық модельдеу нәтижелерін талдау тазарту камерасы мен камерааралық кентіректердің рұқсат етілген параметрлерін еңіс бұрышына байланысты анықтауға мүмкіндік берді. Классикалық тік форманың камерааралық кентірек кен денесінің 25 градусқа дейін еңіс бұрышында ғана рұқсат етілетіні анықталды. Камералық-бағаналы қазу жүйесін пайдалана отырып, 20-35 градус құлау бұрышы бар көлбеу кеншоғырларды өндірудің жаңа технологиясы Жыланды кен орнын зерттеу негізінде әзірленді.